Karyera məsləhət xidməti bütün yaş kateqoriyasına aid olan şəxslərin peşə seçiminə hazırlanması, təhsil, təlim, habelə karyeralarını idarə etməkdə (karyera planlaması) dəstək göstərilməsi, onlarda peşəyə meyil və maraqların formalaşdırılması, əmək bazarının tələbləri nəzərə alınmaqla münasib peşəyə yiyələnməsi və məşğulluğunun təmin olunması məqsədilə həyata keçirilən tədbirlər kompleksidir. Dövlət Məşğulluq Agentliyi tərəfindən hədəf qruplarına karyera məsləhət xidmətlərinin göstərilməsi zamanı müasir çağırışlardan istifadə etmək, beynəlxalq təcrübənin öyrənilməsi və tətbiq edilməsi məsələsi aktuallaşdırılmışdır. Bu məqsədlə müxtəlif istiqamətlərdə yerli və beynəlxalq əhəmiyyətli tədbirlər həyata keçirilməkdədir. Agentlik tərəfindən silsilə şəkildə həyata keçirilən tədbirlərdən biri də karyera forumlarıdır.

Karyera forumları dəyişən əmək bazarı barədə agahlıq yaratmaq, gələcəyin vəd etdiyi peşə və bacarıqlarla tanış olmaq və əmək bazarının müvafiq tələblərinə cavab verən peşəkar kadrların yetişdirilməsi üçün hadisələri qabaqlamaq məqsədilə təşkil edilir. Həm yerli, həm də beynəlxalq ekspertlər forumlarda spiker qismində iştirak edərək zəngin təcrübələrini iştirakçılarla paylaşırlar. Aktiv iştirakçılığa təşviq etmək, produktivliyin artırılması məqsədilə forumlar zamanı çıxışlar edildikdən sonra panel müzakirə formatında bütün iştirakçılar peşəkar müzakirələrə cəlb olunaraq öz fikirlərini səsləndirmək imkanı əldə edirlər. Forumlar zamanı spikerlərlə iştirakçılar birgə əməkdaşlıq edərək, yerli vəziyyəti analiz edib, dünya təcrübəsindəki uğurlu rol modellərini nəzərdən keçirirlər.